يفرن عروس الكاف يازايرها  **  يسرّك هواها ويعجبك منظرها

يفرن بلاد فلاحة   **  بلاد التين والزيتون والتفاحة

وفيها مناظر يعجبوا السّواحة   **  جبال شامخة مضّبطات شجرها

تقول امّ ضمّت ولدها مرتاحة  **  بكل عطفها وحنانها ونظرها

جبال عالية وحنونة    **  ترضّع شجرها في الجذب وتصونة

من كل حرّ وريح عاصف عونة  **  مهما عليها هب ماحيرها

وتشهد بهذا شجرة الزيتونة  **  ثلاثين قرن ؤكامشة موكرها

 

يفرن مليح هواها  **  فيوم جافّ ديمة في صيفها وشتاها

خسر كان من لازارها لا راها  **  ولاعرف منها ناس ولا عاشرها

ولادار في وديانها بنباه  **  ولاجال جولة صيف في ظاهرها

 

ليا زارها بالنـيّة  **  وبقلب واعي من شعوره حيّا

وبات كودجات وقيّلْ الرومية  **  وشرب من اميتهم إجيب اخبرها

وهيّف على القطار ضيف عشية  **  يشوف الطبيعة وعزّ من صوّرها

هيّف على الشرشارة  **  سواء فصبح ولا في عقاب نهاره

يلقى الجبل يسكب دموع غزارة  **  من كل حنية دمعته قطرها

تقول كان فاقد حد من زوّاره  **  ولافرح لن دمعته حدّرها

 

يفرن هواها هايل  **  وسكانها من ليبيا الاوائل

على وطنهم لاحد فيهم حايل  **  فعركة الهاني كان تتصورها

هافوا شباب وشيب فوق ضوايل  **  نار شاعلة بيطفوا لهيب شررها

مع خوتهم زي الغدير السايل  **  ضربوا العدو ضربات يتفكرها

سكانها يتباته  **  نفوسة وبعض صناهجة وزناتة

اللي شيدوا في ما مضى صبراتة  **  منها مشوا بعد الزمان غدرها

عليهم هجم الروم بقواته  **  وجملة شمال افريقيا كسّرها